邊款好?邊隻好?點樣揀先至啱?2021 年最新蒸焗爐選購指南及專家推介 (附消委會報告重點),一定幫到你!

香港寸金尺土,屋企廚房一般都係細小,唔少香港人都會置入一部蒸焗爐,無論焗麵包、糕點、餸菜還是煮飯都可以一部機煮搞掂曬。蒸焗爐集多功能於一身,但唔同型號有唔同特點,究竟哪款型號先啱你?至於其他爐款又有咩分別?使用蒸焗爐又有咩要注意?Built-in Pro電器專家會同跟大家分享2021年唔同蒸焗爐型號,消委會推介和使用蒸焗爐小貼士。

蒸焗爐原理


蒸焗爐簡單嚟講就係「焗爐+電蒸鍋」,底部發熱盤嘅發熱管通電而產生熱能,將鍋內嘅水快速轉化成高溫水蒸氣而蒸熟食物。

而且一機可以做到蒸、焗兩用,令食物快速熟透,既唔會破壞食物營養又有更好口感同埋鮮味。

功能性極多,可以做到蒸、焗烤、燒、焗、燉、解凍、炸(熱風對流),甚至有啲型號可以做到乾果、慢煮,喺屋企都做到多變化嘅菜式。

 

蒸焗爐 vs 水波爐


好多人都會問蒸焗爐同水波爐係咪同一樣嘢?其實兩者功能性上真係差唔多,都係主打煮出健康菜式,但原理上有少少唔同。

水波爐係發明廠商(SHARP)嘅專利商標,原理係先將水加熱至100度變成水蒸氣,再進一步將水蒸氣加熱到超過100度變成無色透明嘅氣體,藉著過熱水蒸氣將巨大熱能穿透食物內部加熱,快速逼出食物中嘅油脂跟鹽分,減少對食物細胞破壞與氧化,就做到減油、減鹽以及保留食物營養。

立即睇睇更多水波爐款式

 

點揀適合自己嘅蒸焗爐


存放空間

香港係彈丸之地,廚房大細同佈局都係揀蒸焗爐主要考慮因素。巿面上有座檯式同嵌入式蒸焗爐,座檯式蒸焗爐可直接放喺檯面,只要連接電源就可以使用;嵌入式蒸焗爐有兩種安裝方法,可分為安裝喺牆上(Wall mounted)或牆壁櫃內(Bench mounted),蒸焗爐同廚櫃亦可融為一體,又慳位又好睇啲。你必須要留意,無論購買座檯式或嵌入式蒸焗爐,都要確認蒸焗爐可唔可以放入廚房。安裝時,最理想係蒸焗爐兩邊、機背及機頂預留空位散熱,有足夠空氣流通。

 

容量

蒸焗爐一般容量都係由15公升至60公升不等,特大容量型號就可達70公升。咁要買幾大嘅蒸焗爐呢?

第一,你需要考慮自己嘅需要。先講蒸煮功能,如果平常所煮食物份量較大,又成日要蒸煮餸菜,容量較大如似30公升以上會較好,可一次過蒸煮幾款餸菜。

至於焗煮功能,要睇你想烹煮簡單嘅食物,抑或想煮出有質素嘅食物啦?如果想煮簡單食物,容量小、約20公升以下爐款嘅蒸焗爐已經足夠,因為容量細嘅爐款發熱線較接近食物,食物容易受熱,適合用於只需短時間烤焗嘅食物,例如焗雞翼、多士,翻熱披薩等。如要用來製作份量大嘅 party 嘢食,咁就要需要較大容量嘅蒸焗爐,20公升以上嘅爐款會較適合。特別留意,爐內發熱線佔去部份空間,選購時應留意實際容量而唔單指機身尺寸。

 

層架/烤架

層架數量有一層至四層不等,唔同型號嘅蒸焗爐有唔同嘅層架數量,食物份量較多就可以考慮選購層架較多嘅爐款,一次就可以同時蒸煮唔同餸菜。

 

溫度控制

蒸焗爐溫度多數係30度至250度,溫度選擇越多,煮食方式就越多元化。你仲可以留意預熱時間,唔同嘅型號預熱時間可相差1倍。另外都要留意爐內溫度均勻程度,如爐嘅溫度分佈唔平均,食物質素就會較水皮啦,例如蔬菜變黃,蛋糕色澤一邊深色一邊淺色等。

 

慳電程度

常用電器,耗電量也較多。想選購較慳電型號,要點樣揀呀?你可以比較唔同型號嘅功率,選擇功率較低嘅型號。功率,俗稱「火數」、「watt數」,學名為「電功率」,即係電器喺用嗰時用電量,量度單位就係瓦特(Watt),簡稱瓦或W。功率越大,耗電量越大。

 

清潔功能

有啲爐款內置有自動清潔系統,有啲就更有易清洗內壁塗層。使用過嘅蒸焗爐入面遍佈油積,清潔都幾麻煩,如果你成日用蒸焗爐,可以考慮買配備呢啲功能嘅型號。

 

兒童鎖

蒸焗爐開啟嗰陣溫度極高,如唔小心靠近爐身,有機會辣手。如果你有小朋友,切記揀一個有安全鎖嘅蒸焗爐,防止小朋友自己亂開蒸焗爐。

 

蒸焗爐食譜

完全唔洗擔心買完蒸焗爐會有相對嘅食譜用,因為其實好多焗爐嘅食譜都係可以通用嘅,至於係蒸煮方面,網上亦有唔少群組同大家交流心得,更有好多唔同嘅實體本好似係由一批熱愛惠而浦蒸焗爐嘅資深用家所寫《千變萬化的蒸焗爐料理》,集合多達 50 款精選網友食譜由專業廚師將網友極具創意嘅菜式重新精心烹製、有營小食、美味健康主菜、精巧甜品一一盡有、蒸焗爐保養與活用都有,更多秘技公開,我哋 Built-in Pro 亦有唔定時連機附送呢本蒸焗爐天書,有興趣就記得 Like 我哋 Facebook 專頁啦。

 

消委會測試比較蒸焗爐(2017年更新)

消委會連同機電工程署評測市面上8款蒸焗爐,測試以效能、環保、安全、表面溫度控制、使用方便程度及聲稱吻合程度評分,更安排蔬菜、海鮮飯、蛋糕煮食測試,比較8款蒸焗爐烹調食物嘅色澤同味道。結果發現各爐款整體表現相差唔大,以5分為滿分,其中3款嘅總評分獲4.5分,另外5款則同為4分。惠而浦CS2320、樂聲Panasonic NU-SC100W同Gemini GSO17G呢3款蒸焗爐,三者總評分都有4星半。

相片來源:Topick

 

比蒸煮速度

各爐款均以100或200℃純蒸煮模式進行測試,將約-20℃的急凍青豆,放在相同的玻璃器皿蒸熱青豆。「樂聲」、「德國寶」至「Cristal」較快達至預定溫度。「惠而浦」或許由於爐腔較大而蒸氣功率沒增加,表現較遜。

 

比焗煮速度

以預熱焗爐測驗各爐款焗煮嘅加熱時間。其中「Cristal」嘅蒸焗爐最高溫度設定只得200℃,預熱測試30分鐘仍未能達到要求嘅溫度而未有完成測試,表現較遜色。「惠而涌」、「樂聲」、「德國寶」及「山崎」嘅蒸焗爐溫升較快,只需約8.5分鐘就去到設定嘅溫度。

 

比焗爐溫度控制

各爐款都可設定溫度,除「山崎Sanki」以扭掣設定爐溫外,其餘爐款都配備電子操控,設定可調節少至相差5℃或相差10℃嘅爐溫,比較方便。從量度爐內實際溫度可發現,「惠而浦」與「Gemini」嘅溫度操控較準確。

 

比煮食表現

以各爐款製作紙杯蛋糕、蒸煮青豆及西蘭花、及烹調海鮮焗飯。所有爐款皆能焗出味道良好的紙杯蛋糕;有些青豆在部份爐款蒸煮後變黃,而所有爐款蒸煮出來嘅西蘭花都稍稍偏黃;所有爐款都能焗出色香味俱全嘅海鮮飯。

 


 

蒸焗爐專家推介 (2021年最新)

Rasonic 樂信 RSG-R80G 60厘米 二合一上下底火蒸焗爐

產品特點

  • 熱風對流、蒸煮、燒烤、蒸烤、熱風蒸烤等多功能設計
  • 3種蒸烤模式 (高、中及低濕度)
  • 約50升特大容量
  • 內置自動烹調食譜、多種烹調程式、6款特別
  • 功能 (保溫、解凍、殺菌、除垢、發酵及暫停)
  • 溫度選擇 35-230°C
  • 外置水箱設計,輕鬆一按自動彈出,無需打開爐門亦可加水
  • 2個蒸氣輸出管及2段蒸氣選擇

了解規格及最新優惠

 

Whirlpool 惠而浦 CS2320 32公升 4S 座檯式蒸焗爐

  • 煮食模式數目: 9 [蒸氣 (3小時)、熱風、熱風對流、加強熱風對流、頂部燒烤、底部燒烤、上下燒烤、熱風加蒸氣、全功能蒸焗]
  • 特別模式數目: 8 [發酵、翻熱麵包、慢煮、乾果、解凍、預熱 (蒸氣/烤焗)、保溫、消毒]
  • 清潔模式數目: 2 (烘乾爐腔、除垢)
  • 電子溫度控制
  • 追加時間
  • 爐腔實際溫度顯示
  • 兒童安全鎖

了解規格及最新優惠

 

Whirlpool 惠而浦 CS1250 25公升 座檯式蒸焗爐

 9個主要煮食模式 

  •  蒸氣 (連續3小時)/熱風加蒸氣/頂部燒烤/底部燒烤/上下燒烤/熱風/熱風對流/強熱風對流/全功能蒸焗 

10個特別模式 

  • 發酵 /翻熱中式包點 /翻熱西式麵包/慢煮/乾果/解凍/蒸氣預熱/烤焗預熱/保溫/消毒 

其他特點 

  • 追加時間/預較時間/水箱缺水提示/清潔接水盤提示/除垢提示/餘溫高溫提示/兒童安全鎖/可向下拉45度發熱線

了解規格及最新優惠

 

Panasonic 樂聲 NU-SC180W 20公升 蒸焗爐

  • 爐腔容量:20公升
  • 烹調模式:低溫蒸、中溫蒸(原氣蒸)、燉煮、健康炸、發酵、烘焗及蒸氣烘焗
  • 內置18款預設食譜及6款清潔功能
  • 爐內設有照明燈

了解規格及最新優惠

 

蒸焗爐正確清潔方法


  1. 每一次清潔前先燜插頭,等機器完全冷卻
  2. 用沾有軟性洗滌劑嘅布擦拭產品外殼,再用濕布擦淨即可
  3. 嚴禁將蒸氣焗爐浸入水或別的液體中
  4. 可用蒸焗爐專用洗滌劑清潔內部污積,再使用高溫蒸汽功能及排水功能去走污水
  5. 為達到最佳清潔效果, 建議使用溫水清洗附件

*唔建議大家亂用白醋或梳打粉,擦洗內部,因為梳打粉加熱後嘅粉末有機會影響機件運作。

 

蒸焗爐常見問題


蒸焗爐運作嗰時,爐門有大量蒸氣排出?

  • 有可能因為爐門或爐門封邊損壞引起。

選用蒸汽功能時,睇唔到入面有蒸汽?

  • 避免喺烤焗煮食後或爐腔處於高溫狀態下使用蒸氣模式,因為蒸氣可能因高溫迅速蒸發。當完成蒸或烤焗煮食模式後,應等待10-15分鐘才進行其他烹調模式。
  • 水箱唔夠水或沒有安置妥善,水泵損壞或管道都可能係原因之一。

焗/蒸完嘢,風扇仍在運作?

  • 烹調結束後,風扇會延時工作,將爐腔內嘅熱量排出,冷卻爐腔同電子零件,屬於正常現象。

 

消委會提供使用蒸焗爐嘅小貼士


  1. 蒸焗爐功率較高,應獨立用一個插座; 

  2. 機背及機頂須預留通風空間,唔好放近窗簾、塑膠或紙張等可燃燒物件; 

  3. 注意焗爐內發熱線及表面嘅高溫,切勿使用磨損性嘅清潔用品清理爐門嘅玻璃表面,避免爆玻璃; 

  4. 煮食時唔好觸摸爐面,亦唔好俾小朋友單獨使用同觸碰; 

  5. 使用後應清洗可拆下嘅烤架或底盆,發熱管及內壁可以軟布輕抹,唔應該使用鋼絲刷清潔以免刮花表面,引至生銹; 

  6. 如果蒸焗爐出現異常情況,有異常噪音、氣味或過熱,應立即停止使用,並搵有經驗技師進行檢查。